Mateo dhe Selin janë përballur mbrëmjen e sotme në emisionin “Post-Big Brother VIP”, ku diskutimet mes tyre kanë qenë të forta dhe të drejtpërdrejta.
I pyetur nga moderatori Ledion Liço nëse Selin e meritonte fitoren, Mateo u shpreh se, sipas tij, ajo nuk e kishte merituar, duke theksuar se loja e saj në BB VIP është kufizuar kryesisht në raportin me Mirin, si dhe në disa përplasje me Rogertin, të cilat ai i cilësoi si pjesë e një strategjie viktimizimi.
Selin, nga ana tjetër, reagoi e zhgënjyer ndaj këtyre deklaratave, duke i kujtuar Mateos se brenda shtëpisë ai kishte pasur një qëndrim tjetër, ku madje kishte shprehur dëshirën që, në rast se nuk fitonte vetë, fitoren ta merrte ajo.
Mateo përsëriti qëndrimin e tij, duke thënë se nuk e sheh lojën e Selin si të plotë, por të ndërtuar mbi situata të caktuara dhe konflikte të brendshme me banorët e tjerë. Ai theksoi gjithashtu se vetë ka qenë i përfshirë në debate dhe përplasje me shumicën e konkurrentëve gjatë rrugëtimit të tij në lojë.
Në debat u përfshi edhe Monika, e cila e vuri në pikëpyetje lojën e Mateos, duke sugjeruar se ai ka përfituar nga situatat e krijuara rreth Brikenës, e cila sipas saj ka ndikuar në rrjedhën e lojës së tij.
Brikena, nga ana e saj, u shpreh se në fund të lojës është fokusuar më shumë në raportin me Mateon dhe se ka pasur simpati për fitoren e tij, megjithatë pranoi se edhe Selin ka pasur momente të forta në lojë, për shkak të debateve dhe përballjeve të saj.
Debati u ndez më tej kur u rikthyen deklaratat e mëparshme mes banorëve, ku u përmendën qëndrime të ndryshme për fituesin ideal të sezonit. Selin, ndërkohë, u shpreh e vendosur dhe krenare për rrugëtimin e saj në shtëpi, duke thënë se nuk pendohet për asgjë nga mënyra si ka luajtur.
Diskutimi vazhdoi me replika të shumta mes ish-banorëve, duke treguar edhe një herë tensionet dhe ndarjet e forta që kanë mbetur pas përfundimit të spektaklit.
