Eliminimi i Brikenës nga shtëpia e Big Brother VIP Albania, vetëm pak hapa përpara finales së madhe, është kthyer në një nga momentet më të diskutuara të këtij sezoni.
Pasi humbi mundësinë e fundit për të siguruar një vend në finale në një përballje të fortë “kokë më kokë” me Rogertin, vendosur nga votat e publikut, ish-banorja ka reaguar për herë të parë publikisht. Në deklaratën e saj të fundit, Brikena nuk e ka fshehur zhgënjimin për rezultatin e marrë.
Ajo ka shprehur kritika të drejtpërdrejta ndaj Rogertit, duke vënë në dukje mënyrën e tij të komunikimit dhe sjelljen brenda shtëpisë, ndërsa ka theksuar se, sipas saj, nuk ishte ai që meritonte të shkonte në finale përpara saj. Megjithatë, ajo ka pranuar vendimin e publikut.
“Më vjen keq që Rogerti shkon në finale para meje, pasi ka përdorur shpesh gjuhë fyese. Gjithsesi, është publiku ai që vendos,” – është shprehur ajo.
Nga ana tjetër, rrjetet sociale janë “ndezur” me komente dhe reagime të shumta, ku shumë ndjekës kanë shprehur habinë se si Rogerti arriti të sigurojë një vend në finale, ndërkohë që, sipas tyre, në sondazhe të ndryshme ai është renditur shpesh si më pak i preferuari.
Madje, nuk kanë munguar as dyshimet dhe aludimet për manipulim të votave, me disa përdorues që pretendojnë se në këtë rast është “shpërblyer” arroganca e perceptuar e Rogertit përballë qasjes më të butë të Brikenës.
